Eras praticas pedagogicas deras escòlas Calandretas que s’emparan sus quauques elements fondators deths tribalhs de Celestin Freinet e dera Pedagogia Institucionau de qui serveishen eth ensenhament en occitan.

Eras escòlas Calandretas que prepausan ua pedagogia activa e diferenciada aon eth mainat ei ath centre deths aprentissatges e qu’ei arrespectat en eth sué caminament e en eth sué desvelopament intelectuau. Aquesta pedagogia qu’ei ath servici deth ensenhament bilingue per immersion e qu’ajuda, a fortiori, eth mainat a bastir-se melhor en ua arrecèrca d’autonomia e d’autogestion. Atau, eths arregents ne son pas mes detentors deth Saber e dera Coneishença, més, que son hornissors de malièra qui ajuda (individuaument o ath miei deth grop) cada mainat a aprener melhor e a progressar sol en un caminament de qui l’ei personau.

• deths tribalhs de Celestin Freinet, qu’arretenguem :

Çò qu’ei amiat com gatge pedagogic qu’ei tot çò de qui ei ligat ath escriut e ara produccion d’escriut : er’estamparia, eth jornau de classa, era correspondença e eth tèxte libre.

Era reflexion de Freinet qu’ei totaument plaçada baish eth signe der’AUBRITURA. Eths mainats que’s basteishent gràcia e per eth monde exterior. Era sua pedagogia que s’empara sus era circulacion deras informacions.

Eths tèxtes escriuts individuaument peths mainats que son corritjats e ameliorats en comun. Gramatica, ortografa que son alavetz vertadèrs gatges en hèr-se comprener melhor. Passar deth costat dera produccion que permet de desvelopar eth esperit critic e de demistifair eth escriut.

Aquesta pedagogia qu’assja de conjugar sociabilitat dab desvelopament dera personalitat e dera libertat individuau. Aqueste sistème que s’aubreish sus era responsabilisacion deths mainats dab ua volontat de socialisacion. Ua organisacion rigorosa qu’ei era caracteristica permera deras classas Freinet.

• dera Pedagogia Institucionau, qu’arretenguem :

Aquesta pedagogia navèra qu’ei eth perlongament deths tribalhs de Freinet.

Ua deras granas caracteristicas d’aquesta pensada qu’ei era bèra importança balhada ara paraula deth mainat e ath sociau. Que consièra er’escòla com ua societat en modèu arredusit aon cada un e s’assaja a èster ciutadan.

Pera paraula, eths conflictes que pòden èster despassats. Eras amassadas, eths conselhs, eras consultacions democraticas que son mediators. Eths mainats que son egaument associats ar’evaluacion deras loas coneishenças.

Eras activitats miadas que demandan organisacion e leis de fonccionnament. Eras institucions de qui encabestran eths escambis e eras activitats dera classa que permeten de depersonalisar eras tensions. Qu’ei er’institucion « eth conselh » de qui torna díser qu’eras règlas, « eras leis dera classa », e son fixadas democraticament peth grop entà ajudar a plan víver amassa. Aquestas règlas que son regularament criticadas, reformadas o aprobadas peth grop. Atau, eth mainat qu’ei considerat d’egau a egau dab eth adulte.

Era Pedagogia Institucionau qu’ei presentada com ua « pedagogia dera hami ». Qi eths mainats an a aprener a « leguir, escriver, condar », aquestes aprentissatges que’s hèn gràcia a un materiau pedagogic bastit a partir de ficas. Era progression qu’ei simbolisada per colors entà deslimitar eths nivèus de coneishenças (sistème de cintas de judò).

Aqueste sistème que s’esten ath domèni deth comportament. Contrarament ara « nòta – sanccion », aquerò que permet aths mainats d’ver ua apressada positiva e estimulanta deth loé aprentissatge, d’evaluar eth camin corrut e eth de qui demora a córrer. Per aqueste sistème de cintas de colors, ne i a pas de competicion de cap aras nòtas. Eth arritme deths mainats qu’ei alavetz arrespectat.