Viatge a Malta de la classa de 3ena
(del 9 al 15 de mai 2023)

Lo dimars 9 de mai, partiguèrem a Malta. Un projècte qu’èra soscat dempuèi la debuta de l’annada e que menèt an aquel viatge.

Tot lo mond participèron a la soscadissa de las activitats que faguèrem aval. Malgrat qualques desacòrds, arribèrem a trobar per nos endevenir e partiguèrem totes contents d’èsser en viatge.

Trobèrem aquel « travel » fòrça interessant culturalament e linguisticament. Aprenguèrem fòrça mots novèls en inglés coma en maltés: per exemple lo mot periklu que vòl díser dangièr. L’ententa dins lo grop classa èra fòrça agradiva, èrem totes dins un bon « mood ».

Vesitèrem de luòcs magics coma la Co-Cathedral St John o la vila de Valetta, los primièrs jorns. Prenguèrem tanben lo batèl per rejúnher l’iscla de Gozo ont faguèrem una passejada. Aguèrem tanben de moments de pausa, ont fasiàm çò que voliàm.

Plan segur, vesitèrem l’anciana capitala de Malta, Mdina ont los tustets de las pòrtas èran fòrça especials, la màger part del temps èran de bèstias !

Lo darnièr jorn, anèrem a la Blue Grotto, l’endrech mai toristic de l’iscla. Malurosament la mar èra pas amb nosautres, las èrsas gigantas faguèron que se podiá pas sortir las barquetas, la cauna èra tampada. Mas poguèrem far la vesita dels temples neolitics de Mnajdra e Ħaġar Qim.

Cada ser nos caliá cosinar lo sopar : cadun son torn, en còlas, prenguèrem lo davantal de cosinièr pel bonur de tota la classa. Elaboracion dels menuts, crompas, cosina, vaissèla, prenguèrem tot en carga joiosament e eficaçament !

E lo 15 de mai, tornèrem totes amassa, plan decebuts de dintrar a l'aeropòrt per tornar dins nòstra polida vila ròsa.

En conclusion, foguèt un viatge fòrça agradiu, amb de païsatges pas familhars e una classa completament espelida.